Uż tu móm RSS!:)

Archiwum:

Zaolziański blogi:

Nie-zaolziański blogi:

Jehowy in english

środa 20.12.2006 11:57

Praga je światowe city. Dowodym tego je aj to, że was tu jehowi zagadujóm po angielsku. Inacz styl majóm tyn sóm, co u nas w Grodziszczu - wciernóm se aż ku waszym dwiyrzóm.

Miejsce a czas se dobrze wybrały, bo na naszej koleji potrzebujecie kolejenke yny jak se chcecie pojczać wysawacz a godzina 10. - 11. dopołednia je idealno pora: wiynkszość matfyzaków akurat stowo, także eszcze nima na pewno zasiedziano u kompa ze słuchawkami na uszach. To by potym babki mógły dzwónić wiela by chciały - myślym, że kupa ludzi tu by takóm po ICQ nieogłoszónóm wizyte zignorowało. Na drugóm stróne szkoda do nich, bo ni tak czynsto wóm u dwiyrzi stojóm goście z Filipin a US...

Ale zpowrotym do tematu - wiycie, że THE END OF FALSE RELIGION IS NEAR!

Ni?
Także jeśli was to zajimo a chcecie znać odpowiedzi na pytania:

Tak se stawcie! Óne pry przidóm zaś, aż se poczytóm prospekcik.

Także uż se bez słuchawek ani nie gnym...

pewny link | komentarze (3)

Zabili mnie dzisio popołedniu

niedziela 17.12.2006 19:20

Nie wiym czymu mnie zabili, ale wiym czymu se mi o tym śniło. Czytóm teraz ksiónżke Filth od Irvine'a Welsha a w ni zaroz w prologu jaksi facet rozsieko inszymu facetowi głowe kładziwkym. A scena zabójstwa je fakt dość niesmacznie opisano...

Jak w moim śnie zabili mnie se nie pamiyntóm. Ale wiym, że policajt, kiery mioł sprawe mojigo zabójstwa objaśnić a kierymu żech tłumaczył, co se stało, był tak samo nieochoczy jak główny bohater wspóminanej ksiónżki.

Ogólnie cały sen był pełny skojarzyń z rzeczywistościóm. Np. w jednym pomieszczyniu na parterze budynku, w kierym mnie zabili, żech se potkoł z moim ćficzóncym z databázových aplikací (taki młody typek). Ty cfika też mómy na parterze - w komputerowej laborce. Akurat że we śnie ta laborka wyglóndała troche inaczyj, nie było tam skoro żodnych komputerów a miyndzy tymi, kiere zbyły, góniła partyja z florbalkami. To akurat kapke nie siedzi, bo florbalke tu na kolejach sice móm, ale florbal uż pół roku nie gróm...

Ciekawym skojarzyniym była aji przednaszka, na kieróm żech chcioł iść (uż po sfoim zabójstwie). Miała być u nas na szkole, ale temat był niematfyzacki, bo to mioł wykłodać jaksi profesor z prawnicki fakulty. W realu w tymtu roku chodzym na ekonomie, kieróm wykłodo profesor z FSV, ale z prawnikami kalym czynsto, tak możne tymu był pan profesor z PF. Ja a przednaszka dopadła tak, że przijechoł spóźnióny a jak to zjiścił, tak prawił, że to uż nimo cene a odjechoł zpatki.
Straszny sen.

Co z tego snu wg mnie płynie? Czytejcie ciekawe ksiónżki przed spaniym, studiujcie na ciekawej szkole a kalcie z ciekawymi ludziami - bejecie mieli ciekawe sny!

pewny link | komentarze (6)

Obiod w centru Pragi za 4 koróny

czfortek 14.12.2006 19:47

Miołech dzisio szkołe do 14. a po szkole straszny głód a w planie jedno przedani biletów na Akademik o 15. na Staromaku, także jedyne rozwiónzani było pojeść cosi na mieście... A tymu, że żech z dobrych źródeł słyszoł, że w Bio Marketu u mostu K. sprzedujóm paczke chipsów Lays za 3,90, takch nie rozmyśloł długo a prawił se, że to testnym. No a nie kecali mi, ale fakt sóm za takóm cene! Tak jeśli se chcecie dać obiod tak jak jo, tj. kliczkujónc z paczkóm chipsów miyndzy turystami na najsłynniejszym praskim moście, tak ale śpiychejcie, bo nejpuźni 18. 12. uż by tych chipsów w sprzedaży nimiało być...

pewny link | komentarze (3)

Wikend, wierszyk, wyznani

pióntek 8.12.2006 01:20

W sobote żech siedziónc u piwka w Piaście słyszoł zdani pewnej szanownej osoby, że bych mioł na blogu pisać po polsku. Musiołch oponować...

W niedziele żech na scenie w Sikoraku biglowoł to, że żech w sobote za bardzo gorliwie oponowoł a za mało se pośfiyncoł tymu, z powodu czego żech wogóle do Piastu szeł. Ofszem nie tylko to - gorliwie nie tylko oponujym, ale potrafiym aji słuchać. A niestety zbyt ciekawi ludzie mnie potkali w złym czasie na złym miejscu...

W poniedziałek żech stwierdził, że jak zawsze fszystko złe mo sfoje dobre strónki. A że nareszcie chcym cosi napisać po polsku... I choć to nie beje z moi głowy, ale o to nie idzie. Ważniejsze w tym wypadku je, że to je z moigo serca...

W twoje cudne, cudne, cudne oczy
kiedy patrzę: wstrzymuje się słońce
i dziwuje im się kwiat na łące,
i czar idzie z niebieskich roztoczy
w twoje cudne, cudne, cudne oczy.

W twoje cudne, cudne, cudne oczy
kiedy patrzę, chciałbym w łzę zaklęty
po twej twarzy spłynąć, bogom wziętej,
i z twej piersi patrzeć się uroczej
w twoje cudne, cudne, cudne oczy.

 Czytelnicy-poloniści se mogóm typnóć, gdo je autorym;) A minimalnie jedyn w niedziele przypadkowo napotkany polonista aji to, z kierej ksiónżki żech czerpoł...:)

pewny link | komentarze (12)

Je żech drugi notoryk świata

wtorek 28.11.2006 00:05

Nie wierzicie? Aż do fczora żech to sóm nie wiedzioł. Pióntkowe targniyńci własnego piwnego rekordu żech broł jako wyjóntkowy wyczyn, kiery se nimo okazje hned tak powtórzyć (mamuś, to podkreślóm głównie kfuli Ciebie)

Btw. Brno je fantastyczne miasto! Niestety wiyncyj niż na jedyn wikend w roku bych se tam nigdy nie odważył jechać, bo bych wartko skóńczył z tfardóm wóntrobóm a pustym kontym...

Ok, puste konto móm uż teraz... Ale do tematu!

Otóż fczora żech był świadkym objawiynia. Jako bardzo ciekawski człowiek se sem tam spytóm słónia, kiere mi tu produkuje statystyki wejść na blog, co słychać nowego miyndzy wami. A słóń mi oprócz wami używanych systemów operacyjnych a przeglóndarek (btw. Firefox wygrowo - kochóm was) zdradził aji to, co se o mnie myśli sóm wielki Google.

Google se myśli żech je drugi nejwiynkszy notoryk na świecie - nie tylko w porównaniu z inszymi polskimi strónkami, ale też w porównaniu z angielskimi. Akurat miyndzy czeskimi żech je aż trzeci... Ale starołch se kfuli tego nie beczeć...

Ku tymu honorowymu miejscu mi wystarczył jedyn jedyny wpis, kaj żech se niechcóncy opisoł jako notoryk. Czyli całe to je pomyłka! A nie beje to o nic mniyjszo pomyłka i choć bych za pore dni albo tygodni odkrył, żech uż je piyrfszym notorykym świata... Bo jaksi pijacki słownik to je dość słabo konkurencja...

pewny link | komentarze (10)

Kiedy se fakt czujym Polokym

poniedziałek 27.11.2006 01:41

Dzisioch se uśfiadomił, że nigdy se nie czujym Polokym tak bardzo, jak w sytuacji, że gdosi bezpodstawnie obrażo Polske albo Poloków. Niestety do fszelijakigo typu kretynów je internet idealny środek komunikacji. Na drugóm stróne sóm ludzie, kierzi majóm siłe z tymi miyni inteligentnymi dyskutować. Jo osobiście żech jóm niestety nigdy nie naszeł...

pewny link | komentarze (6)

IC czyli idealno ciasnocha

pióntek 17.11.2006 12:25

Nigdy żech ČD jakosi wyraźnie nie krytykowoł, pomimo tego że trasóm Cz. Cieszyn - Praga a zpatki jeżdżym ostatni 2 roki niemal tygodniowo a okazji by było dość. Ale dzisio se nie odpuszczym - po tym, jak żech fczora zażył, jakim sposobym Ci amaterzi wywożali z Pragi połówke Morawy a Ślónska na przedłużóny wikend do chaupy
(Dzisio je świynto państwowe - do tych, co to eszcze nie zaregistrowali A nie myślym to nijak pośmiesznie, bo do mnie to je też yny dalszy wolny pióntek jako każdy inszy)

Nie wiym, czy menedżeróm ČD brakuje fantazji tak samo jak mnie albo po prostu na pasażerów seróm, ale w taki sytuacji ku cugóm z Pragi nie przistawić ani jedyn wagón na wiyncy... Dać jim takim cugym zjechać - myślym, że by jich to wspamiyntało.

Osobiście żech mioł te przijemność jechać ostatnim IC (Jan Perner) z wyjazdym 17.18 z Pragi. Prziznóm bez bicio, że to, jaki beje w cugu nawał, żech se uświadomił aż w momencie, jak żech se na okiynku kasy w Holeszowicach przeczytoł info, że wszystki dzisiejsze Pendolina sóm wysprzedane. Eszczech se nieśmiało spytoł pani, czy do tego moigo IC przypadkym eszcze nie idzie kupić rezerwaczka, ale ta mi yny potwierdziła moje obawy: "Pouze do první třídy." Tak żech gibko fikoł na Hlawak w oczekiwaniu nejgorszego.

Moje oczekiwania były nic w porównaniu z tym, co se dzioło na perónie. Byłech tam 10 min przed odjazdym a do cugu uż se skoro nie dało wlyźć! Bez srandy. Nacisłech se ze fszystkimi sfoimi taszkami na kóniec ostatnigo wagóna, naukłodoł ich na pieknóm piramidke, zajmnół tam majóm miejscówki, pytali, aż jich tam puszczymy Jakosi se eszcze narwali, ale żodyn z naszej prziwychodkowej partyji se na nich nie dziwoł 2x przijemnie...

No, z lekkim spuźniyniym, ale wyjechali my. Zaczłech rozmyślać o tym, że to beje trza blognóć, ale nie wiedziołech, jak by tyn ścisk dobrze opisać. Prziszłech na to aż w momencie, jak żech se chcioł napić. Po petke (1,5L) rajca żech se eszcze jako tako poradzioł zegnóć, ale abych se z ni móg napić, tak żech musioł troche gimnastycznie se nachylić na bok, abych se zrobił troche miejsca koło głowy a móg jóm ostrożnie miyndzy głowami a ramiónami inszych podniyść do pozycji horyzontalnej

Takim stylym my jechali z Pragi aż do Olmika. Myślym, że w Pradze se eszcze fszyscy do cugu wlyźli, puźni w Kolinie, Pardubicach a Czeski Trzebowej to uż niestety nikierym nie wyszło (wiynkszościóm se dostali yny ci, co zaś rzwali, że majóm miejscówki - zbytek se ani nie próbowoł rwać, bo po prostu nimioł kaj - każdy z nas prziwychodkowych uż mioł sfoje miejsce na stoci a nie myśloł se z niego gnóć) Btw. jednej ewidentnie zaskoczónej Japónce, kiero se ze sfoim kufrym starała w Pardubkach przeciść ku sfoimu miejscu, gdosi ochoczo tłumaczył, że "Tomu se u nás říká tetris."
Nic inszego nie zbywało, tak my to brali z humorym (Jaksio 30-latka do podobnie starego faceta, oba zawadzali u dwiyrzi, przez kiere se akurat przeciskała miejscówkowo elita: "Můžu se na Vás trochu přitisknout?" Pan se szyroko uśmieje: "Ale samozřejmě!" Skoro żech mu zazdrościł, że mo taki gupi miejsce...

W Olmiku nareszcie plus minus jedna czworto aż jedna trzecio cugu wylazła, także uż se zrobiło na tela miejsca, że miyndzy nami mógli przechodzać ludzie. Tego oczywiście hned wykorzystoł do tej pory niewidoczny cfaker.
Pryndzyj po ceście uż leciały fcipki typu "Pruvodčí už určitě vysedl v Kolíně a počká si na nedělní vlak zpátky." albo "Celou cestu jen 2 m do záchoda? Za to asi bude ten příplatek!"
Także jak se po wyleziyniu ludzi w Olmiku pan cfaker zjawił a po tym, jak se my rozjechali a ón skoro stydliwym głosym zagłosił: "Předložte jízdenky, prosím!" tak se my fszyscy od serca zaczli śmioć. Ale i tak mu jóm każdy doł, bo co z nióm, jak uż je zapłacóno... Btw. za skoro jedyn a pół godzinowóm ceste do O-wy ścignół przynść a skóntrolować nasz ostatni wagón...

Za Olmikym zaczło być w cugu przijemniyj a to eszcze z jednego powodu - jedyn Słowok, kierymu se ku nóm podarziło narwać w Czeski Trzebowej zagrzeboł w baglu a wycióng półlitra Jelinkowej trześniówki. Nigdych to przedtym nimioł a muszym rzyc, że była fakt dobro A konsekwencjóm tego było to, że od teraz asi bedym musioł w cugu jeździć z półlitrym w baglu, bo na mnie zbył ostatni łyk

W Hranicach zaś trocha ludzi wysiedła, także do O-wy uż my dojechali komfortowo, mieli my każdy sfój kónsek ściany na oprzici. W O-wie na nas pieknie czakoł cug na Cieszyn (niestety puźni żech zjiścił, że nie czakoł yny na nas, ale to uż mnie tak nie srało, jak gdyby mi odjechoł), także w Cieszynie żech był skoro wg. planu.

Ciekawo było ale aż do kóńca, boch se w osobaku przisiednół ku jakimusi wykecanymu 50-nikowi, kiery umioł po naszymu, choć nasze zdania tak pół na pół miychoł z czeskimi (nie wiym, czy ze srandy, skoro to tak wyglóndało) Tak my pokecali tak o fszystkim możnym. No a w Cieszynie se z niego podle wizytówki wykiełkowoł jaksi pan poslanec Kufa, tak żech był fest zaskoczóny, że borocy muszóm jeździć cugym a że se do O-wy nie lotajóm samolotym Tak to asi yny Ci, kierzi sóm akurat u kor...w rzóndzie

pewny link | komentarze (11)

King of Kolejnet

czfortek 9.11.2006 00:13

Dzisiejszy wieczór żech był na naszej kolejnej sieci KING Sice nejwiynkszo frajerzinka je być królym tygodnia, ale tacy machrzi uż tymu potym dość kupa muszóm pośfiyncić... Wiynkszościóm pore dni bez netu

pewny link | komentarze (5)

Urodzinowo impreza se zbliżo

wtorek 7.11.2006 09:19

A jo se tym eszcze ani nie pochfolił. W sobote 11 listopada beje na Kościelcu impreza urodzinowo z okazji 5-lecia naszego Klubu Młodych W Grocie Stankosia. Informujym o tym dość puźno, ale niestety przygotowania do ni mnie tak wyczerpujóm twórczo, że se mi uż na blog nic nie chce pisać...
Wszystkich czytelników (a czytelniczki) serdecznie zapraszóm! Przidźcie, uwidzicie mnie grać na scenie, to se hned tak nie widzi!

pewny link | komentarze (6)

Gruchajóm jak gołómbki

niedziela 29.10.2006 11:31

A wubec se za to nie stydzóm, baraby!

Niestety, jak se tak dziwóm przez okno, słóneczno jesiyń uż definitywnie skóńczyła...

pewny link | komentarze (1)

Rozmyślać, nie klikać!

wtorek 17.10.2006 21:34

Być może żech mioł tyn wpis napisać uż rychli, możne by to niekierym oszczyndziło zbytecznych kłopotów. Zdecydowołch se na to aż teraz, jak mi uż od 5 znajómego z Contact Listu na ICQ prziszła wiadomość z podejrzanym linkym sygnalizujónco, że dany człowiek łapnół tzw. worma.

Konkretnie idzie o worma zwanego Win32/Stration albo też Win32/Warezov, ale to małokogo beje zajimać. Co by was mógło miało zajimać wiyncy je, jak se tyn wormik rozszyrzo. Stosuje bardzo prostóm ale skutecznóm metode - wykorzystuje ludzkóm ciekawość. Sami se go nainstalujecie a to tak, że z netu ścióngniecie a spuścicie plik, na kiery wóm przidzie odkaz od (zainfikowanego) znajómego z ICQ. Wormsik se pieknie nainstaluje, uprzóntnie se nowe mieszkanko (baji tym, że wóm wypnie antywirus albo firewall) a pośle se dali ganc tym samym sposobym, jakim se dostoł ku wóm.

Momentalnie (czyli dzisio) przebiegła uż 3 fala ataku tego wormsa. Ku czci autora muszym rzyc, że pokażde je atak bardziyj przemyślany niż poprzedni. W piyrfszej fali worms posyłoł samotny link na plik .exe. To by każdego lekko podejrzliwego właściciela systemu Windows hned miało szasnóć po oczach, ale wiela takich je, że?...
W drugi fali se link tfarził jako że prowadzi na obrazek (.jpg), ale ku ścióngnyciu se zaproponowoł zaś plik .exe.
Trzecio fala je zaś o krok inteligetniejszo, nie chodzi uż yny sóm link, ale aj zachyncajóncy tekst ku nimu, kiery was hecuje, aż se ścióngniecie nowóm gre. Mnie konkretnie prziszło to, ale adres linku może być pokażde troche inny:
Look, a new office killer game. Go download and join the rest of us! My nick there is Miril! http://gc.quijindeshkinmas.com/programs/lkncs/lim/msdfg.zip

Także ludzie! Rozmyślejcie a dziepro potym klikejcie! Oszczyndzi wóm to kupa starości! Ale jeśli uż wóm to rychli szkubie palcami niż myśli, tak wóm na pewno pómoże informacja, jak se wormsika zbawić.

pewny link | komentarze (9)

Dobywani Pragi po ostrawsku

niedziela 15.10.2006 19:06

Alias Banik jedzie na Sparte. Prziznóm se, że fusbal dość mało oglóndóm, także żech o dzisiejszym zapasie nie wiedzioł aż do momentu, jak przi przijazdu na perón w O-wie nasze ECeczko powitały banikowski chorale. W tyn moment żech se dosłowa prawił "A do fucku...", bo 4 godziny z urzwanymi fandami w jednym wagónie bych nie wydzierżoł ani z Żofkóm na uszach. Naszczynści se dość wartko ukozało, że tak straszne to nie beje, bo chłopcy w czornych mundurkach fszystkich fandów pieknie poprosili do ekstra wagóna, kaj jim po zbytek drogi dotrzymywali towarzystwa. A oprócz tego żech potym zjiścił, że to był dziepro "przedwoj" a wiynkszość fandów jedzie aż dalszymi cugami.

I tak nas uż ale na każdym cugowym, kaj my zastawowali, oczekiwały grupki chłopców mundurowców. W Pradze uż to nie była grupka, ale cało ekipa a w dodatku w pełnej zbroji. Zaciekawiło mnie, że oprócz policajtów se przyjazd banikowców na kamere nakryncali aji jacysi cywile. Żeby spartiański wywiad? No a oczywiście byli aj reporterzy z jaksi TV. Jaki dokładnie to żech se nie ścignół podziwać, bo jak żech wysiednół, tak uż jich jaksi nie było widać... Możne se za bardzo wezli do serca to, że banikowcy powitali Prage na sfój sposób, czyli zbiorowym skandowaniym "Pražské kurvy!"
Nie za bardzo oryginalne, ale miało to sfojóm atmosfere...

pewny link | komentarze (3)

Find x

poniedziałek 9.10.2006 23:57

Dowcip do fszystkich, kierzi se aspóń cosi z matyki na średni pamiyntajóm...

Btw. zwladniecie go wyrachować?

pewny link | komentarze (3)

The quick brown fox jumps over a lazy dog

czfortek 5.10.2006 17:39

Jakosi mnie łapła muza, tak to wykorzystóm a znieużyjym jóm (albo odwrotnie) a wpisnym eszcze jedyn wpis.
Chciołech wóm dać zagadke, co je ciekawego na zdaniu “The quick brown fox jumps over a lazy dog”, ale potym żech se prawił, że za 30 sekund googlynio nikómu piwko sponzorować nie bedym... Także jeśli chcecie, tak se to możecie zjiścić yny tak, dla poszerzynio własnych horyzontów!

pewny link | komentarze (5)

Po studiach do pracy - łatwo czy niełatwo?

czfortek 5.10.2006 17:03

Mnie to eszcze w najbliższej przyszłości nie dotyczy, ale bardzo mnie zaciekawił artykuł na aktualne.cz o szansach absolwentów studiów uniwersyteckich na znaleziyni pracy. Interesujónce na nim je, że nima yny teoretyzowaniym, ale je oparty o aktualny sondaż Střediska vzdělávací politiky Univerzity Karlovy a niektóre dane statystyczne ku sondażu sóm nawiyncy publicznie dostympne.

Użyteczne to je głównie do przyszłych maturantów, ale myślym, że aj aktualnych studentów by to mógło ciekawić...

pewny link | skomentuj

Niezrozumiyni

środa 4.10.2006 22:59

Nic se mi tak samo od siebie a nagle nie przydarzy jak to, że nie zrozumiym kobiete...

pewny link | komentarze (5)

4 dni bez kropli alkoholu

pióntek 22.9.2006 00:13

Uwaga! Możne wóm po przeczytaniu tego wpisu zacznym przipadać jako notoryk, także jeśli mnie nie chcecie za takigo brać, tak możne raczy dali nie czytejcie

Tak se mi przitrefiło, żech nafasowoł tabletki, kierych używani wymagało nie picio alkoholu. Normalnie to 'niepici' bierym z rezerwóm, ale teraz żech mioł ty tabletki brać yny 4 dni, tak żech se prawił, że to fakt w stu procentach dotrzymiym. No, skóńczyło to tak, że choć żech tabletki nafasowoł uż zeszły czfortek, tak ostatnióm żech se weznół aż dzisio. Poprostu przez wikend jich zacznóć brać nie szło, fakt ni. Musiołech se to niechać aż na poniedziałek. Co wiyncyj, yny dzisio żech nikómu nie musioł tłumaczyć, czymu na piwo nie pujdym albo że te flaszke wódki dopijymy kiedy indzi...

Jako notoryk se ale nie czujym. Toch se maksymalnie czuł na kóńcu wakacji (tych gimplowskich) przi dopołedniowych poważnych rozmowach z rodzicami (ewent. popołedniowych, jak była imprezka przez tydziyń). Ale faktym je, że okazji nie brakuje... Brakuje akurat czasu, co mi możne nakóniec wychodzi na zdrowi...

Btw. jutro idym na mojito party, uż se cieszym

POPRAWKA: Właściwie uż dzisio. A toch fakt chcioł iść fczasi spać, bo muszym jutro stować uż przed 7... Idym se przibrać z gimplym do kina, nie chcecie iść też?

pewny link | komentarze (5)

Przekludziłch se z Grodziszcza do Trzanowic

środa 13.9.2006 00:48

Uż nie miyszkóm w Cierlicku - Grodziszczu, ale w Cierlicku - Trzanowicach. Gdo tymu nie wierzi, niech se przejedzie od Cierlicka ku Grodziszczu (albo naopak) a fszymo se po ceście znaczek. Albo, jeśli se orientuje w terenie, niech se kuknie tu.

Fszystkich Grodziszczoków (właściwie ex-Grodziszczoków) może aspóń pocieszać myśl, że wraz ze zmianóm miejscowości zamieszkania nóm odpowiedzialni ludzie zafundowali plus minus kilometr drogi z pozwolónóm 70-kóm (zamiast 50-ki).
Dobrze, że aspóń tak, bo z Cierlicka do Trzanowic to uż nima tak blisko, jak kiejsi bywało do Grodziszcza...

pewny link | komentarze (6)

WGrocieStankosia.Org

niedziela 10.9.2006 21:46

Możne to wiycie, możne ni, ale uż skoro 5 roków żech je człónkym Klubu Młodych o nejciekawszej nazwie na Zaolziu Od samego poczóntku pełniym w klubie funkcje wiceprezesa a od niedowna aji funkcje webmastera. Ta mi teraz zabiyro dość kupa czasu, także pomimo tego, że nasze klubowe strónki uż przez dwa tygodnie jadóm, tak żech se tym przyndzyj nie ścignół pochfolić...

pewny link | komentarze (5)

Zaproszyni na impreze SMP

sobota 2.9.2006 09:36

Byłech poproszóny o wywieszyni jednego plakatu w centru Cierlicka a tak mnie napadło, że bych go móg wywiesić aj tu Bo impreza se zapowiado dość ciekawie, także sóm jóm móm w planie odwiedzić. Także aj was serdecznie zapraszóm na Miyndzynarodowy Festiwal Twórczości Młodzieży organizowany przez SMP (móm nadzieje, żech to tłumaczyni moc nie skomolił).

pewny link | komentarze (4)

Eszcze roz dziynkujym

środa 30.8.2006 23:59

Za odkludzyni do dómu dzisio rano... :*

pewny link | komentarze (3)

Gruntowani

niedziela 27.8.2006 00:45

Tak żech se dzisio z niczego nic puścił do wielkich porzóndków u mnie w pokoiku a jednóm z rzeczy, kiero rozproszyła mojóm uwage... nie wiym, jak wyglóndo skludzani u was, ale u mnie wyglóndo tak, że wiynkszość czasu czytóm ksiónżki, kierych se cały rok nie fszymóm.. Tak jak prawiym, jednóm z rzeczy, kiero (oprócz ksiónżek) rozproszyła mojóm uwage było miniaturowe zdrzadełko, kiere żech naszeł w kiśni od sfoi T610ki (ja, fórt móm te, kieróm żech se kupił uż przed rokym a pół a fórt działo) Jak prawiym, miniaturowe zdrzadełko, kiere se do zamóntować obok obiektywu z przodu telefónu, tak abyście se przi focyniu mógli na siebie podziwać (ale polecóm ku tymu dobre bryle) No, jak prawiym przi focyniu, tak tym myślym, że żech to hned musioł wypróbować. Także fszyscy fani moich autoportretów, prezent dlo was!

pewny link | komentarze (7)

Antyspam

poniedziałek 21.8.2006 10:01

Uż aji mój prymitywny zaolziański blog zaczły odwiedzać spamboty - czyli tacy jedni, kierzi nie czytajóm moje fantastyczne wpisy, ale prosto ku nim piszóm komentarze. Gdyby pisali do rzeczy, tak by mi to ani tak nie wadziło, ale sto linków na erotyczne strónki mi je aktualnie fakt do niczego...

Tak żech postanowił wykucić prymitywny antyspam. Pomysł na niego nima mój, aczkolwiek se wóm może wydawać, że to je typowo matfyzacki rozwiónzani Móm nadzieje, że nim ale odrownóm yny spamboty, ni aji nikierych czytelników

pewny link | komentarze (3)

ExpeRumu 2006

środa 16.8.2006 11:39

Jaksi zdjyncia z ExpeRumu, kiere se mi zdały z jaksigo powodu warte opublikowania, wraz z komentarzym a mniyj wiyncyj chronologicznie.

Troche danych statystycznych na poczóntek. Ekspedycja trwała od 31.7 (wyjazd) do 12.8 (przyjazd). Udział wziyli (w kolejności przypadkowej): jo, Magda, moja segra, Endrju, Mato, Ewa z Marym, Krysia z Kubóm, Lenka, Tado (głowa, kiero to całe wymyśliła) a Kefir (Tadów kolega, kierego żodyn z reszty przed tym nie znoł).

Cało sranda se (do mnie ze segróm) zaczła na nadru w O-wie Swinowie. Reszta wyjyzdżała z Głównego, oprócz tajemnego Kefira, kierego my postanowili nónść. Musioł se o nas dość ciekawe rzeczy z poczóntku myśleć...
Droga tam była całkiym przijemno, pomimo tego że długo (ponad 24h) Możne aji tymu, że my z Budapesztu do Devy (Rum.) jechali łóżkowymi wagónami - jo piyrfszy roz w życiu. Hladani Kefira W wagónie sypialnym Droga na piechote se nóm zaczła w miejscowości Racovita. Stamstyl też pochodzi jedyne wspólne foto, na kierym my sóm fakt fszyscy. Nie myślcie se, że tam majóm taki szure nadro, to yny jo źle ustawił statyw.
Na poczóntku my eszcze mieli możliwość se radzić z tubylcami, na górach uż se my musieli spolygnóć yny na mape. Na cugowym w Racowicie Tubylcy radzóm Tubylcy tam byli dość ochotni. Potrzebowali my se z tej Racovity dostać do inszej wsi, z kierej prowadził szlak turystyczny, tak se nas piyrfsze starali nakierować rynkami (domówić po rumuńsku se nie szło) a jak widzieli, że my źle skryncili, tak przijechoł facet na mopedu a osobiście nas przekonwojowoł przez całóm wieś aż ku tej dobrej drodze.
Dacia 1300 (a jeji odmiany) je tako rumuńsko Škoda 120. Nie zdo se to, ale je to porzóndne auto - do taki jednej se nas puźni, jak my stopowali, wcisło sztyrech aj z krosnami. Za przewodnikym Rumuńsko wieś, Dacia 1300 a my Góry tam były fantastyczne. Pogoda z poczóntku też, musieli se my w potoku chłódzić. Góry wyglóndały naprawde zachyncajónco Ochłódzyni w potoku Hned piyrfszego dnia my potkali jedyny bacowski szałas podczas całej ekspedycji. Był to piyrfszy baca, kierego my potkali - różnych baców my eszcze po ceście potkali kupa, ale fszyscy byli ze sfoimi stadami, daleko od szałasu. Naszczynści my od razu wykorzystali okazje a wyhandlowali my z bacóm bryndze. No my...nie bedym skromny - jo z segróm.
Zbytek wyprawy siedzioł w bezpiecznej odległości a czakoł, czy a z czym se wrócymy. Bryndza fszystkim szmakowała, była fakt super - delikatno, śmietankowo. Domówa z bacóm - rynkami, nogami Zbytek czakoł, czy se wrócymy Poczóntek drugigo dnia w górach eszcze troche przipóminoł nasze góry, ale dość wartko se my przibliżyli 2000m a tam uż ta krainka wyglóndo inaczyj. Prawie jak Beskidy Plus minus 2000m nad morzym Piekno pogoda uż nóm potym dłógo nie wydzierżała. Ale mieli my troche szczynścio, bo wraz z tym jak prziszeł deszcz my dorazili ku jeziorku, kaj oprócz gromady owiec (to sóm ty biołe kropki) było aji fajne miejsce na postawiyni namiotów. Tam my zażyli sfojóm piyrfszóm fagaraszskóm burze. Jeziorko Avrig (2007 m n.p.m.) Ku jeziorku szła droga pieknie z kopca Burza przeszła stosunkowo wartko, tego samego dnia se eszcze zrobiło strasznie pieknie, uż ale było puźno na dalszóm droge, tak my zustali u jeziorka na noc.
Nikierzi szalyńcy se w nim kómpali i choć czynść brzegu była pokryto śniegym... (no, możne gdybych wiedzioł, za jak dłógo se bedym mioł dalszóm możliwość se okómpać, tak bych do niego też wlóz...) Fakt romantyczne miejsce to było :) Szaleńcy... Matowi była potym tako zima, że eszcze przed zmrokym musioł wylyźć nad kopiec nad jeziorkym. Zrobił piekne fotki (ni yny sobie - nie fszystko ale przeszło cenzuróm) Widok na nasz kemp (prawie) z kosmosu :) Mato na samym szczycie Cióng dalszy (być może) nastómpi...

pewny link | komentarze (5)

Zaś dóma (2)

niedziela 13.8.2006 17:54

Ostatni miesiónc żech se na pełno używoł wakacji poza domym. Kapke na wartko se to całe zorganizowało, także mi o tym ani nie wyszło do przodku napisać. Tak teraz.

Ostatni 2 tygodnie lipca żech był w Polsce na stażu zawodowym zorganizowanym przez fundacje Semper Polonia (te od kierej dostowóm stypko). Potym żech przijechoł na wikend - na tatowóm 50-ke a spakować se. Ostatni dziyń lipca żech zaś na 2 tydnie odjechoł, tym razym do Rumunii połazić po górach.

Użyłch se tyn miesiónc fakt fantastycznie, o dość wiyncyj niż żech czakoł. O obowiónzkach szkolnych a roboczych żech nie myśloł, odpisowołch yny na pilne smski a na blog żech niechoł napadać porzóndnóm warstwe prochu. Teraz wartko wracóm zpatki do wiru tego fszystkigo codziynnego, także aji z blogowaniym zaś zacznym, choć na pewno se mi nie udo skoczyć o miesiónc do tyłu a fszystko tak ciekawie opisać, na ile by to zasłużyło.

Ale chciołbych aspóń to ścignóć (taki "to do list"):

Ja a jeśli was dziwi ta dwójka w tytule, tak ta tam je po prostu dlatego, że uż jedyn wpis pt. Zaś dóma tu móm. Niestety, ale ciynżko mi po roku a pół zustać fórt w stu procentach oryginalnym...

pewny link | skomentuj

Kilka (po)wikendowych spostrzeżeń

poniedziałek 10.7.2006 11:29

1. Uż zaś jedzie mail na Seznamie. Ciekawe, że "były" email.cz, kiery je teraz uż też pod opiekóm Seznamu, jechoł bez problemu... No, ale wkurzyli mnie - 3 dni bez działajóncego emailu a óni nie byli zdolni o tym do przodku poinformować... No, uż se to nie stanie, uż móm konto na gmailu.

2. Zmrożóne borówki jydzcie aż rozmarznóte. Sóm potym słodki! Możne se dziwicie, co tu wypisujym za gupoty, ale fakt żech aż teraz zjiścił, że jak jich nie niechocie rozmarnóć, tak szmakujóm o ciutek lepi niż kónski lodu... Ale rozmarznóte - pychota!

3. Producenci piwa se systematycznie przigotuwujóm na zaprowadzyni Eura. Latoś 10-ka Radegasta była na Zlocie uż za 22,-. Typujym, że za 3 - 4 roki beje za 1 Euro. Mómy se na co cieszyć, no ni?...

pewny link | komentarze (2)

I look at you and smile because I'm fine

czfortek 6.7.2006 08:12

Nejpiekniejsze poranki sóm ty, kiedy se budzicie a piyrfsze co widzicie, je tfarz kogosi kogo kochocie. To potym aj informatycy bez problemu stowajóm o 7 rano.

(Przepraszóm za taki słodkości, ale jech eszcze pod wpływym... Btw. mieliście kiej griotke z kofolóm? Polecóm)

(Btw. 2: Gdo posłócho The Killers, możne zgodnie, z jaki piosynki żech se pojczoł tytuł...)

pewny link | komentarze (5)

O szczynściu

środa 28.6.2006 21:11

Zkuszki sóm o szczynściu. Nie wygrowajóm yny ci nejchytrzejsi, ale głównie ci, co majóm szczynści.

Ale to, co mi dzisio prawił profesor Kratochvíl, jak mi zapisowoł jedynke do indeksu, że "štěstí přeje připraveným", tez płaci. Bo na każdego sem tam szczynści zapómni a jaksi to trza aj bez niego docióngnóć aż do czasu, niż se na nas zaś fspómni...

pewny link | komentarze (3)

Pan Twardowski

poniedziałek 19.6.2006 20:14

Uż żeście se możne fszymli, że momentalnie intenzywnie pracujym nad zapocztym z Aplikačního software. Dalszym ze zadań na zapoczet było wytworzyni kómplikowaniejszego dokumentu w Wordzie (możecie se kuknóć, co fszystko my tam mieli mieć). Kapkech se pobawił z treścióm, tak jeśli se chcecie poczytać matfyzacki remake Pani Twardowski, tak śmiało!

pewny link | komentarze (3)

Už ani obláček!

sobota 17.6.2006 10:56

Ekonomi jaksi ostatnim czasym zaskakujóm. Ula biere jednóm namakaniejszóm robote za drugóm a Majjo se doł na propagacje zdrowego życia bez dymu: Už ani obláček!
A jo? Jo całymi dniami siedzym u kompa, fczora żech do 3. rano siedzioł nad jednym z zadań na zapoczet z Aplikačního software (jaksi kolaż w Photoshopu), także nuda...

pewny link | komentarze (2)

Pierdolić takóm pogode

pióntek 16.6.2006 16:22

Wiym, że wy fszyscy, gdo uż mocie po zkuszkach (myślym na was z zazdrościóm całymi dniami) se asi nie bejecie zgadzać z tym co teraz powiym, ale: Do dupy z takóm pogodóm! Kaj je tyn obiecywany chłódny czerwiec?!? Czymu uż skoro tydziyń nima w Pradze ani chmury?! Niech uż pyteczki zapadze!!!

Uff, troszke se mi ulechczyło... Prziznowóm, że ani nic inszego nie było zamiarym tego wpisu.

No nic, odlepiym spocóne rynce od klawiaturki, skóntrolujym jeśli mi zaś guma u przepocónych spodiarów nie powoliła o dalszych 10cm, popracujym na jejich odlepiyniu od krzesła a zóndym se naloć dalszóm szklónke zimnej wody...

pewny link | komentarze (6)

Woe, segra mnie buzeruje, woe...

wtorek 13.6.2006 23:44

Że pry abych cosi napisoł, woe. Ale o czym, woe, jak woe, pogoda jak cyp a ni yny na polu, woe. Stypko w kapsie, a woe nie chcym se chfolić, ale całkiym dość, woe, ale i tak uż je całe w tej... w prdeli. Woe. Także woe, dopijym te fife z winym a pujdym se naloć dalszóm, bo pry 2 - 3 dziynnie sóm zdrowe a jo se średnióm nigdy nie przejmowoł.

Tak zmianu planu - winko przijdzie samo. Także dobro rada, woe. Nigdy nie pij sóm;)

A jak uż blogujesz a pijesz woe, tak nie pisz za każdym drugim słowym woe, bo bejesz wypadać na totalnego, tego... na chuja, woe;)

pewny link | komentarze (2)

Trzeciok w suchu

czfortek 1.6.2006 16:09

Dołch dzisio matematickóm analize II, także żech spłacił zeszłoroczny dług a przi jednym aji nazbiyroł dostatecznóm ilość kredytów abych był "przipuszczóny" do dalszego roku studiów . W przecióngu prziszłych 4 tygodni mnie sice eszcze czako 7 zkuszek (6 + 1 zapoczet, kiery bierym jako zkuszke ), ale teraz uż tu beje taki wiyncyj fklidu...

pewny link | komentarze (3)

Moja mało przedwyborczo agitacja

środa 31.5.2006 01:33

Uż żech tu przed pore dniami naciuknół sprawe zbliżajóncych se wyborów do parlamentu RCz, dzisio ku nim eszcze roz powrócym. A prawdopodobnie to nie beje ostatni roz, biorónc pod uwage sposób, jakim je prowadzóno tegoroczno kampania przedwyborczo.

Trefił żech dzisio na ciekawóm strónke - taki zastanowiyni nad tym, jaki zadani by miało pełnić państwo i jakóm role by w tym mieli mieć politycy. Poglóndy w nim zawarte sóm bardzo bliski tym moim, także dołónczóm do przedwyborczej agitacji, formóm której ta strónka oczywiście je. Przeczytejcie se to a porozmyślejcie nad tym, niż pujdziecie wybiyrać prziszły rzónd... Możne wóm to ułatwi wybór.

pewny link | komentarze (1)

Porno jako reklama na ciuchy

poniedziałek 29.5.2006 00:44

Ja, czytocie dobrze Aj takim sposobym se do reklamować. A realizacja je moim zdaniym wyśmienito - dobrze nakryncóne, dobrze zladzóne z muzykóm - a głównie dobry pomysł

Ale ostrzegóm, pomimo tego to je fórt porno! Także jeśli mocie jakikolwiek moralne albo psychiczne bloki zwiónzane z seksym albo jego ekshibicjonowaniym, tak se na to nie dziwejcie. Potym uż beje za puźno

pewny link | komentarze (3)

Beje pracowoł do nas. Uż yny tydziyń:)

pióntek 26.5.2006 19:19

Uż se też tak cieszycie na wybory?;) Uż yny tydziyń :)

pewny link | komentarze (2)

Jak king przijyżdżóm do Cieszyna

sobota 20.5.2006 12:32

Dość czynsto jeżdżym do dómu sobotnim iceczkym 5.18 z Pragi, bo mi z kilka przyczyn bardzo odpowiado. Je skoro prózne, także chycić wolny stolik w letadlowym wagónie nima problem. U stolika se mi fajnie spi, bo se idzie nacióngnóć nogi a oprócz tego wiynkszościóm przed tym niż jadym uż ani nie idym spać, także o tej pół 6. se mi uż fakt chce a usnym hned za Libnióm:) Wiynkszościóm se koło Olmika albo eszcze puźni obudzym, do Cieszyna mi zbywajóm niecałe 2 godzinki drogi a to je akurat tela, wiela wydzierży moja Kiśnia:) A w Cieszynie tyn cug bywo wiynkszościóm na czas a tak akurat ścigóm przesiednyć na autobus do chaupy... Po prostu idealno droga do dómu:)

Przyjazd do Cieszyna je ale wyjóntkowy sóm o sobie. W cugu uż skoro nikogo nima, czynsto wylazujym sóm, odewrzym se dwiyrze a naroz se czujym ganc "jak król":) Na pierónie mnie czako tłum ludzi tak wyraźnie nacieszónych przyjazdym cugu a przeciskajóncych se w mojóm stróne, że mnie skoro nie niechajóm wylyźć z cugu! Stojym dycki na tych schodach a rozmyślóm czy do tego ścisnótego kłymbka ludzi a toreb do zakupów nie skoczyć...:)

Myślym, że wiynkszość z was znajóncych Cieszyn wiy, czymu mnie czako taki uwitani;) Jeśli se to gdosi nie domyślo, tak eszcze przipómnym, że je sobota a uzupełniym, że cug jedzie dali aż do Żiliny:)

pewny link | komentarze (2)

Ach ta pogoda...

pióntek 19.5.2006 16:47

Słóneczko śfiyci, wiosna w pełni... też se wóm tak nie chce uczyć, jak je na polu tak pieknie?

Btw. uż żech je o dalszy zapoczet bogatszy...:)

pewny link | komentarze (4)

Ci prawdziwi tfardziele...

sobota 13.5.2006 00:16

...dziepro fczora dostali sfój piyrfszy letni zapoczet. Żodne hej hou hej hou w półówce maja, bitwa dziepro zaczyno!

Btw. z okazji uzyskanego zapocztu testujym obrazkowe smajliki, tak se ku nim możecie konstruktywnie wyopiniować.

pewny link | komentarze (6)

Kod Leonarda da Vinci

poniedziałek 8.5.2006 02:13

Po dłuższym czasie ksiónżka, kieróm żech "musioł" przeczytać za jednym zamachym. Móm rod ksiónżki, kiere miyszajóm prawdziwe fakty, miejsca a postacie z fikcjóm:) A jeśli w nich tempo akcji nie zwalnio ani na chfile, tak se fakt nie poradzym odtargnóć...

Do przeczytanio mnie głównie zmotywowało to, jaki we świecie wzbudziła kontrowersje. U niektórych dość negatywne, o czym żech mioł okazje osobiście przekonać, jak żech se chcioł nónść jaksi info o autorze - patrz screenshot z wikipedii. Btw. za pore minut uż to było sprawióne...

W każdym razie żech je ciekawy na film - i choć mi je luto, że Roberta Langdona (głównóm postać) beje grać Tom Hanks. Raczyj bych kogosi mniej znanego, z ni tak zprofanowanóm tfarzóm jak Forrest Gump, Trosecznik czy typos z Terminala. Ale i tak se na tyn film zóndym kuknyć:) aktualizacja 17.6.2006 Tak film podle oczekiwań - ciekawy tak maksymalnie do tych, kierzi nie czytali ksiónżke. Nimogym powiedzieć, że by mnie jaksi wyraźnie skłamoł, ale prawdopodobnie yny dziynki tymu że żech po przeczytaniu kilku recenzji od niego nic ekstra nie czakoł...

pewny link | komentarze (8)

Je to dóma!

niedziela 7.5.2006 00:24

Nareszcie uż aji dóma w Grodziszczu mogym na Internet kiejkolwiek potrzebujym:) Po 2 miesióncach czakanio se Czeski Telecom zlutowoł a zprowoznił nóm ADSL.

Pryndkość 512/128 sice nima KolejNetiacki 100-megabit, ale na ICQ, mailowani a podobne życiowe potrzeby to starczy:) Ja a oprócz samotnego dostympu do Internetu mo cało sprawa 2 dalsze plusy:
1. Mómy ADSL modem z routerym - czyli mómy teraz dóma małóm sieć a uż nie muszym wycióngać data z dómowego peceta przez empemena (nasze domowe PC nimo wypalowaczke ani nic podobnego).
2. Mómy router z WiFi access pointym (po czeskiemu je WiFi bezdratové připojení) - czyli praktycznie mogym z notebookym surfować kajkolwiek siyngnie sygnał, np. we wannie:)

pewny link | komentarze (3)

Wycieczka do Anglii - czynść 3.: obrazki z Londynu

poniedziałek 24.4.2006 12:00

Uż asi po szóste żech fczora prezentowoł fotki z wycieczki do Anglii, tak chcym wartko wykorzystać to, że żech se zaś troche odśfiyżył wspómniynia:)

Opisywać Londyn je bardziyj temat na przewodnik, ni na (jedyn) wpis do blogu. A ani se o to nie bedym staroł - beje wóm musieć wystarczyć pore fotek uzupełniónych moimi wrażyniami, na wiyncyj se fakt nie zmogym...:)

Piyrfsze wrażyni, kiere żech tam mioł było, że Londyn je tako wiynkszo Praga:) Ganc taki same, jak wtedy, jak żech piyrfszy roz przijechoł do Pragi. Cosi w stylu "Wow, to tu je wieeeelki!":) Za rok a pół żech se uż na Prage zwyknół na tela, że uż tu to uczuci nimóm, ale Londyn je jednak wiynkszy:)

Ok, oto zdjynć kilka (dowóm tu yny sfoje, nie wiym, czy by mi Damik pozwolił publikować jaksi jego fotki a i tak żech mioł z czego wybiyrać:)

W Londynie je drugi nejwiynksze ruski koło na świecie, mówióm mu London Eye a mo 135m wysokości. London Eye z daleka London Eye Listek na niego stoi 13 liber a to było ku kóńcu wycieczki uż na mnie za moc. Także żech nim nie jechoł. Bierym to jako fajny powód, czymu do Londynu zaś zajechać:)

Londyński metro je nejstarsze na śfiecie a je to na nim znać. Ale mo sfojóm atmosfere, każdo stacja je inszo, je ciekawsze niż to praski. I choć w pośrodku wyglóndo podobnie:) W metrze Fakt ostro kamera A je pełne kamer, ale to ni yny metro - kamery tam sóm fakt na każdym rogu. Ale ta antygołymbiowsko je z metra:) (jeśli se dziwicie, jak se do metra mogóm dostać gołymbie, tak ta stacja była czynściowo na powierzchni:)

To, że ście sóm w kraju, kaj panuje królewsko rodzina, poznocie ni yny po pinióndzach a znaczkach pocztowych (na kierych je fszyndzi yny królowa Alżbieta II), ale aji po tym, że naroz na drodze obok was zastawióm ruch a o chfilke puźni se tam "mignie" kolaska jak z bajki:) Btw. z ruchym kónnym se w Londynie jak najbardziyj liczy:) A aji z bajkerami:) Kolaska jak z bajki Dżentelmeni na kóniach a rowerkach majóm w Londynie zielónóm:)
Trowniki w Londynie sóm przysłowiowo angielski. Sztrasznie se mi podobało, że nie było zabrónióne po nich szłapać, raczyj odwrotnie, w parkach to było ganc normalne:) A fakt se o nich starajóm. O trowniki se tam starajóm... Grodziszcki lyń na angielskim trowniku Ale utrzymywani trowników tam majóm dość ulechczóne klimatym - za całóm zime tam pry śnieżyło pół godziny a oprócz tego z własnego dośfiadczynia mogym powiedzieć, że lekki deszczyki a słóneczno pogoda se tam zmiyniajóm bardzo regularnie:)

A czym se mi Londyn zdoł najbardziyj wyjóntkowy? Moc inszych milionowych miast żech nie pozwiedzoł, tak nimóm z czym moc porównać, ale strasznie se mi podobało to, jaki je różnorodny (kulturowo) a głównie jak sóm ty różne kultury blisko siebie a fszelijak namiychane po całym Londynie. Np. nowoczesne City z drapaczami chmur je hned obok dzielnicy, kaj se czujecie jak w Bangladeszu:) Ale to se niestety na fotkach moc nie do uchwycić (teda, mi se to nie udało). Tak aspóń se kuknicie, jak wyglóndajóm dómki na Camdenie (też bardzo ciekawo dzielnica) a jakich ludzi możecie potkać na ulicy:) Camden - ulica Camden - dómki Że przez to cosi widzóm... Punx need beermoney:)

pewny link | komentarze (6)

Expert na miny

niedziela 23.4.2006 14:13

Ostatnimi dniami pracujym o 106. A jednóm z rzeczy, ku kierej żech se dopracowoł (oprócz specyfikacji r.p.) je moim zdaniym całkiym piekny rekord;)

pewny link | komentarze (6)

Ročníkový projekt

pióntek 21.4.2006 00:11

Aż do niedzieli żech mioł głowe pełnóm Śmiergustówki, aż do dzisia żech mioł głowe pełnóm rocznikowego projektu. W skrócie se go do określić jako (do tej pory) nejwiynkszy szkolny projekt.

Je to piyrfszy softwarowy projekt, kierego realizacja zależy od nas od samego poczóntku aż do kóńca:
1. muszymy wymyśleć temat (określić problem), kiery bedymy w ramach projektu rozwiónzywać
2. załatwić kogosi, kogo ta problematyka zainteresuje
3. dokładnie specyfikować sposób realizacji projektu
4. zrealizować to co my obiecali
5. fszystko porzóndnie zdokumentować

Dzisio żech mioł termin oddanio dokładnej specyfikacji (tzn. momentalnie żech zakóńczył punkt 3.). Także dlo zainteresowanych: specyfikacja mojigo projektu a strónki mu pośfiyncóne.

pewny link | komentarze (3)

Zaś sóm...

czfortek 13.4.2006 01:24

Dzisio (fczora) se odkludził Tom (mój spolubydla na kolejach). Podobnie jak w zeszłym roku bedym mioł do kóńca letnigo semestru pokój yny do siebie. Móm teraz 2x wiyncyj przestrzyni na odkłodani sfoich rzeczy:) Ale nima z kim pokecać, pośmioć se...

pewny link | komentarze (2)

Łapła mnie (skoro) śmiergustówkowo atmosfera

wtorek 11.4.2006 01:29

Posłóchóm imprezowóm muzyczke a uż se strasznie cieszym...na partyje, na tequile, na to jak zaparzym:) Btw. mocie jaksi propozycje, co byście tam chcieli słyszeć?;)

A jeśli nimocie poniyńcio o czym mówiym, tak wóm możne aspóń kapke pumoże zaproszyni.

pewny link | komentarze (5)

Wycieczka do Anglii - czynść 2.: angielski pocióngi

niedziela 9.4.2006 13:11

Jadym vlakem vyšší kvality do Pragi, tak mnie napadło krótko pisnóć cosi o pocióngach w Anglii. Yny krótko, bo tygodniowe dośfiadczyni na jednej trasie (London Paddington - Reading, ewent. Reading - Oxford) nie starczy na jaksi porównani, ale konkretne doświadczyni móm taki: Angielski pocióngi sóm ciche, wartki (+- 40 mil my jeździli za +- 35 min) a skoczóm na kolejach asi tak malutko, jak prażski metro... Spuźniynia majóm regularne, głównie w godzinach szczytu - podobo se mi, że u spuźniónych cugów nie podowajóm czas prawdopodobnego spuźniynio, ale czas o kierej je oczekiwany odjazd (expected:) A jedna rzecz na kieróm bedym eszcze dłógo fspóminać - sóm mastnie drogi:)

pewny link | skomentuj

Wycieczka do Anglii - czynść 1.: double deckerki

wtorek 4.4.2006 00:26

Fszyscy jich znocie, czyrwóne piyntrowe autobusy z kierych słynie Londyn. Ale faktym je, że nie jeżdzóm yny w Londynie. Choć żech se fszymnół, że yny w Londynie jeżdzóm czyrwóne (a żodne insze), natomiast poza nim jeżdzóm jakikolwiek insze yny ni czyrwóne. Interesowało by mnie, czy to tak je naschfol, czy to był yny przypadek... Nie wiycie?

Jeżdzyni DD-ym je idealne głównie w sytuacji, jak uż człowieka po całym dniu trajdanio miyndzy pamióntkami fest bolóm nogi... Siedniecie na jaksigo, kiery mo akurat wolne fleki w przodku na piynterku a możecie oglóndać wieczornóm Oxford Street z wysokości 4 metrów:)

Double deckerki w Londynie Widok z piyntra Wieczorno Oxford Street Aż nie bedym wiedzioł, co z pinióndzami, tak se jednego kupiym do Pragi:)

pewny link | komentarze (4)

Matfizacy

czfortek 30.3.2006 16:31

Bez komentarza... :)

Jaký je rozdíl mezi matfyzákem a bezdomovcem? Matfyzák má menší tašku a v ní notebook za 100 tisíc.

Możecie se kuknyć na wiyncyj podobnych dofcipów. Ale ostrzegóm, możecie se o mnie zacznóć myśleć, żech je fakt jakisi dziwny, że studiujym na tym matfizie;)

pewny link | skomentuj

Wycieczka do Anglii - czynść 0.: wstymp

czfortek 30.3.2006 01:39

Zakerzno antymatfyzacko zagadka je rozwiónzano, także jako żech obiecoł:

To je piyrfszy ze serii wpisów o moji zeszłotygodniowej wycieczce do Anglii. Móm za moc wrażyń, abych jich fszystkich nacis do jednego wpisu, oprócz tego asi małogdo by go doczytoł do kóńca, także myślym, że dlo mnie aj dlo was beje lepsze, jak bedym pisoł na leasing;)

Tak dzisio yny krótko: jechoł żech tam praktycznie yny tak, zwiedzać:) Razym zy mnóm tam jechoł aji Damik a oprócz nas Maro z Agóm, ale z tymi se my potkali aż na miejscu, tzn. w Readingu - je to miasto, kaj aktualnie pobywo Andrzejek, kiery nas do Anglii zaprosił (kómu ty miana nic nie mówióm, mo pecha, ale wierzym, że takich moc nima;)

Tyle na dziś, idym uż spać, bo mi trza jutro fczas stować a focić rozwodniónóm Wełtawe...:)

pewny link | komentarze (2)

© fszystki fpisy sóm moje:) Chester