Uż tu móm RSS!:)

Archiwum:

Zaolziański blogi:

Nie-zaolziański blogi:

When September ends

pióntek 30.9.2005 00:47

Mogym se nareszcie nachfilke zastawić.
Ostatnich pore dni żech fszystek czas, coch nie przerandził z M. albo nie przefocił z Canonym (ewent. jedno i drugi razym:), pośfiyncił pisaniu zapoczciaku... Zapoczet móm, także tym samym móm zrobióne aj programowani II, analize niestety ni. Ale jech rod, że je jak je, mógło być gorzyj...:)
Teraz se nachfilke spocznym, dzisio żech po dłógim czasie przesurfił cały wieczór a yny czytoł a ogłóndoł to co mnie zaciekawiło. Nachfilke, bo w poniedziałek mi zaczyno szkoła... Ale cieszym se, wakacje były udane, tak żech je teraz optymistycznie nastawióny:)

Btw. rozmyślóm, jak nazwać sfoigo Canona. Empemenu mówiym Žofka, laptopu Kiśnia (mówi mu tak M., ale mnie se to zaczło podobać, je to w pewnym sensie sympatyczne określyni:) Także jak? Klidnie cosi wymyślcie;)

pewny link | komentarze (6)

Dokąd pójdziesz Polsko?

poniedziałek 19.9.2005 15:53

Móm taki zwyczaj, że dycki jak żech je sóm dóma, tak se ku jedzyniu puszczóm kiśnie, abych nie jod "sóm". No a dzisio tak wyszło, że mi ku rybce a babcinymu dobrymu ziymniaczanymu sałotu grały ogłoszenia komitetów wyborczych (możne nikierzi wiycie, że w Polsce sóm 25.9 wybory parlamentarne). Normalny człowiek se na to asi dłógo nie wydzierży dziwać, ale jo, asi tymu że ostatni miesiónc uż telewize widzym yny u tego jedzynio, se na to dziwoł przez cały obiod. A chwilami żech nie wiedzioł czy se śmioć, czy beczeć...

Piyrfsze żech se śmioł (a przi jednym zazdrościł polskim studentóm) - SDPL mo w sfoim programie zlepszyni edukacji a jedno z haseł je: "Podręczniki chudsze o połowę." Faktycznie dobry pomysł, aji ekologia na tym zysko:)) Eszcze by mógli chcieć aj nauczycieli skrócić o połowe, to by potym aji zaoszczyndziło szkolnictwo:))
No, ale nieśmiołch se dłógo. Chfile puźni zacznół Michał Wiśniewski wyć "Dokąd idziesz Polsko?". Eszcze że uż żech te rybe mioł obranóm z ości, bo bych se asi do teraz dusił... Ich Troje żech nigdy nimioł jaksi moc rod, ale że jim odbije na tela, że propagujóm Samoobrone... Ale anich nie dogryz to coch mioł w gymbie a uż żech se śmioł zaś, hlaszka że Polske trzeba zlepperować" mi uświadomiła, że nigdy nie beje tela dostatecznie gupich ludzi, aby tako partia dostała znaczóncóm ilość głosów. A jeśli bedóm fórt tak przeciwko liberałóm (jak óni sami nazywajóm fszystki insze partie), tak jim tych niecałych 10%, kiere w sondażach majóm, beje starczyć tak akurat na blokowani mównicy w Sejmie:)
Na drugóm stróne, Samoobrona nima jedyno pofikano partia, eszcze niż żech dojod, tak mnie ścigli postraszyć chłopaki i dziewczyny z LPR... Dónść oni do władzy, tak se asi bojym do Polski jeździć... (nimach katolik, do kościoła chodzym mało a jak uż, tak przi kozaniach wiynkszościóm usynóm).

Jech ganc ciekawy jak to w tych wyborach dopadnie, i choć normalnie polityke moc niemuszym. To se ale unść nieniechóm...

pewny link | skomentuj

Kanon Canon

sobota 17.9.2005 00:52

Móm go uż pore dni, ale aż teraz mi wyszło o tym pisnóć. A foci fakt fajnie a to eszcze nie umiym wyużyć ganc fszystki finty, co umi:) Nie mówiónc o tym, że eszcze nie umiym porzóndnie focić...
No, ale jednóm rzecz uż żech se na nim używać nauczył: tyn suprowy 12x opticki zoom!:) No, fszak kuknicie sami;) Bez zoomu Zoom 12x Zoom 12 x 4 = 48x Fszystki fotki sóm focóne u nas z okna w obywaku:
1. bez zoomu
2. z 12x zoomym (maksymalny opticki)
3. z 12 x 4 = 48x (maksymalny opticki + digitalni)

Ja a sóm uż ciut uprawióne, ale bez Auto Levels to prostie nie idzie... zacim:)

pewny link | komentarze (3)

Przedjechała mnie baba!

poniedziałek 12.9.2005 20:51

A przedjechała mnie na kole! Sice jo jóm przed tym dojechoł a przedjechoł piyrfszy, ale stejnie to była dobro borka - fszymnółch se ji na Błyndowszczoku w kierunku na Żermanickóm zapore, miała asi 400 - 500 m naskok... a dognołch jóm aż w Luczinie (asi małogdo wiycie, kaj to je - po prostu aż po pore km...) Akurat nie wiym, kaj se potym straciła, bo hned jak mnie przedjechała, tak żech skryncił do lewa do jednosmierki, zdało se mi że też chciała odboczyć do lewa, akurat że podle przedpisów... (je tam taki trójkóntne skrziżowani:) Ale potym uż jóm jaksi nie było widać...:/
Szkoda, eszcze se mi to niestało, rod bych pozawodził kapke wiyncy...:)

pewny link | komentarze (2)

Uśmiech Billa Gatesa a dwie poranne uśmiechniynte smski

czfortek 8.9.2005 09:53

Chciołech se z wami yny krótko podzielić 2 zdarzyniami, kiere mi ostatnio wyczarowały uśmiech na tfarzy..:)

Fczora w autobusie przi ceście na Kościelec żech se dowiedzioł, że se uśmiechóm jak Bill Gates a...

...dzisio rano żech hned po obudzyniu mioł na mobilu 2 piekne smski - jednóm strasznie miłóm a drugóm strasznie pocieszajóncóm:)

Oooo happy day:) (uż se czujym, jak Bambula, że se tak po ranu śpiywóm:))

pewny link | skomentuj

Spleśniały talyrz

poniedziałek 5.9.2005 16:33

...wycióngła dzisio babcia z naszej myczki, jak nóm prziszła zrobić definitywny porzóndek u nas na wrchu (babcia miyszko na parterze) przed tym, niż se wieczór wrócóm nasi z urlopu. Była dość szoknóto, jak go uwidziała, no jo kapke też... nie czakołch, że po pore (+- 10-ciu) dniach poradzi talyrz s troszkóm zbytków od jedzynio tak dobrze napleśnieć:) A tyn syf, fuj! Ani na obozie żech taki nie zażył...:) No, eszcze że uż żech był po śniodaniu a nimiołch w kuchyni uż nic do załatwianio, także żech se pieknie zmył... (tak samo jak ta pleśń z talyrza, jak se do ni puściła babcia:)

pewny link | komentarze (2)

Móm (nowy) fociak!

niedziela 4.9.2005 09:45

Je to Canon Powershot IS S2 a zacim je eszcze w US, ale zaniedługo przijedzie:) Sice na niego zacim nimóm forse, ale jelikoż uż pomalutku finiszujym z pracóm, tak by jaksio forsa miała być...:)

pewny link | komentarze (3)

Aj laf Cielaf. Aj lafd Cielaf...

czfortek 1.9.2005 09:27

Fszyscy to asi wiedzóm, od tego roku uż żodne Cierlickie Lato Filmowe, ale Trzynieckie Lato Filmowe... Je logiczne, że mie to jako Cierliczoka sztfie, a ni yny tymu, że żech to na Cielaf mioł 10 min na kole a teraz to móm 40 min (to ale eszcze jak jadym tempym na rekord, ni na film do kina:)
Sztfie mnie to głównie tymu, że w cierlickim kinie to miało te atmosfere - małego, starego kina - z małym ekranym, biydnym nagłośniyniym, drzewianymi siedziskami a krytami od radiatorów (na tych se też siedziało:) a fest schodzónym a fest szarym linoleum, to fszystko eszcze z czasów naszej wiecznej przyjaźni ze Zwiónzkym Radzieckim. A teraz se przedstawcie taki kino a Nude v Brně - ludzi tela, że narwane aż po pował, fszyscy se kulajóm ze śmiychu, jo w piyrfszej raji se uż skoro walóm po ziymi a każdóm chfile czakóm, że se to na mnie zacznie ze zadku sypać albo se zesypie całe kino... :) Poprostu cosi, co uż człowiek inaczy nimo moc szanse zażyć...
A jeszcze jedna rzecz, kiero mnie irytowała, ale uż żech jim jóm odpuścił. Jak żech se dziwoł na plakat tegorocznego TLF a czytoł trzynieckie 13. lato filmowe, tak mnie dycki pichło u serca... jaki 13.?! No, ale teraz, jak uż żech te przeprowadzke kapke strowił, ocenióm aspóń to, że nie napisali 13. trzynieckie lato filmowe... To by było moc (zaznaczóm, że osobiście nimóm nic przeciw 3ńcu;)

Szkoda, Cielaf mi beje chybieć... I choć, niebedym przedwcześnie beczeć - pore filmów eszcze w Cierlicku puszczóm...:)

pewny link | komentarze (2)

© fszystki fpisy sóm moje:) Chester